24 படம் எப்படி ?

26 ஆண்டுகள் கழித்து குழந்தை வளர்ந்து ஆளாகி பெரிய சூர்யாவாகிறது (மணி). சென்னையில், கைக்கடிகாரங்களை பழுதுபார்க்கும் கடைவைத்திருக்கிறார். அந்தக் கடிகாரத்துக்கான சாவி தற்செயலாக மணியிடம் வந்து சேர, அது காலத்தை முன்னுக்கும் பின்னுக்குமாக நகர்த்தும் அற்புத டைம் மெஷின் என்பதை உணர்கிறார்.

தமிழ் சினிமாவின் சுதந்திரம் என்பது பலூனில் அடைக்கப்பட்ட காற்றின் அளவு என்பதற்கு இந்தப்படம் மீண்டும் ஒரு உதாரணம். டைம் மெஷின் கான்சப்ட், ஏ.ஆர். ரகுமான், சூர்யா, தமன்னா, ஒளிப்பதிவாளர் திரு என இத்தனை பேரை வைத்துக்கொண்டு இன்னும் அதே பழைய தமிழ் சினிமாவின் அரதப்பழசான பழிக்குப்பழி ரத்ததுக்கு ரத்தம் வகையில் படம் எடுத்துக்கொண்டு இருப்பது வேதனை. டைம் மெஷின் கான்சப்டை வைத்து எத்தனையோ வகையில் கதைகளை வடிவமைக்கலாம், அதையெல்லாம் விட்டுவிட்டு அதையே காதலுக்கு பயன்படுத்துவது. அண்ணன் தம்பி சண்டைக்கு வைத்து பழைய அதே தமிழ்சினிமாவை திணித்தது படுவேதனை. முக்கியமாக படம் முழுதுமே கடிகார்த்தை வைத்து இறந்தகாலம் மட்டுமே செல்கின்றனர். ஒரு காட்சியில் மட்டுமே பெயருக்கு இருக்கும். (மழை பெய்யும் காட்சி) முன்னோக்கி செல்வதாக வைத்து எத்தனையோ கிளைக்கதைகளை இடைசொறுகலாம்.

எல்லாவற்றுக்கும் மேலாக டைம்மிஷின் கான்சப்ட், இறந்தகாலத்துக்கு சென்று இழந்ததை மீட்டெடுப்பது இது போன்ற விஷயங்கள் ”பாலாபிஷேகம்” செய்யும் சாதாரண ரசிகர்களை, நடுத்தர குடும்பங்களை சென்றடையுமா என்பது சந்தேகம்.

சைன்டிஸ் அப்பாவாக, வாட்ச் மெக்கானிக் மணியாக, ஆத்ரேயா எனும் வில்லனாக அசத்தியிருக்கிறார். ஆனால் பல இடங்களில் நாம் பார்த்து அலுத்துப்போன அதே டெம்ப்ளேட் நடிப்பு. மூன்று பேரில் ஒரே ஆறுதல் ஆத்ரேயா மட்டுமே. நாற்காலியில் அமர்ந்த படியே கண்களில் கொடுரத்தை உமிழும் வில்லத்தனம் அற்புதம்.

கதாநாயகி சமந்தா சமத்தா வருகிறார், போகிறார், ஆடுகிறார், பாடுகிறார், அவ்வளவுதான்.

மற்றொரு நாயகி நித்யா மேனன் கொஞ்சம் நேரமே வந்து போனாலும்திருப்தி.

படத்தின் இரண்டாவது ஹீரோ ஒளிப்பதிவாளர் திருநாவுக்கரசு. முக்கியமாக ஆரம்ப காட்சிகளில் மழை துளிகளை பிரீஸ் செய்வது. ஆய்வுக்கூடம், பாடல்களில் வரும் இடங்கள்.

இன்னொரு ஹீரோவாக இருந்திருக்க வேண்டிய ஏ ஆர் ரஹ்மான் பெரிதாக சோபிக்கவில்லை. பாடல்கள் ஓக்கே ரகம். முக்கியமாக ”காலம் என் காதலி” மற்றும் “நான் உன் அருகினிலே”  இந்த இரண்டு பாடல்கள்.

2.40 மணி நேரம் படம் ஓடுகிறது. தேய்ந்து போனா காதல் காட்சிகளில் சிலவற்றுக்குக் கத்தரி போட்டிருக்கலாம். என்னதான் இருந்தாலும் ஒரு முயற்சியின் அடிப்படையில் ஒருமுறை கண்டிப்பாக பார்க்கலாம் 24.